माणदेश एक्सप्रेस न्युज
कडेगाव/प्रतिनिधी : येथील जगप्रसिद्ध मोहरमच्या ताबूत भेटी होतात, त्या सुरेशबाबा देशमुख चौकातील सुशोभीकरण करण्यासाठी एक कोटी रुपयांचा निधी सांगली जिल्हा परीषदेचे अध्यक्ष संग्रामसिंह देशमुख यांच्या प्रयत्नातून मंजूर झाला आहे. याबाबतचे पत्र जिल्हाध्यक्ष व नगरपंचायत यांना मिळाले आहे.
कडेगाव येथे जगप्रसिद्ध हिंदू-मुस्लिम ऐक्याचे प्रतिक असणाऱ्या मोहरम सणाच्या ताबूताच्या भेटी ज्या ठिकाणी होतात. त्या ठिकाणच्या स्व.सुरेश बाबा देशमुख चौकात मात्र मोठ्या गैरसोई होत्या. या चौकाच्या सुशोभिकरण करण्याबाबतीत अनेक वर्षे केवळ राजकीय घोषणाच झाल्या होत्या. मात्र जिल्हा परिषद अध्यक्ष पदाची सुत्रे हातात घेतल्यानंतर मुस्लिम समाज व हिंदू समाजातील लोकांना आपले ग्रामीण कार्यक्षेत्र नसतानाही, जिल्हा नियोजन समितीतून कडेगावातील या ऐतिहासिक चौकाचे सुशोभिकरण करण्याचे आश्वासन दिले होते. त्यांनी आपले आश्वासन पुर्ण केले. नुकतेच नगरपंचायत व जिल्हाध्यक्ष संग्रामसिंह देशमुख यांना एक कोटी रुपयांचा निधी आपल्या मागणीनूसार मंजूर झाल्याचे पत्र मिळाले.
या एक कोटी निधीतून संपुर्ण चौकातील सिमेंटीकरण,पेव्हिंग ब्लॉक, यात्रे करीता येणाऱ्या लोकांना पिण्याची सोय, जुना कराड रस्ता डांबरीकरण,चौकात अजून एक हायमस्ट लँम्प,सध्या मोडकळीस आलेल्या स्टेजचे नुतनीकरण, चौकाच्या कडेने वृक्षारोपण अशी योजना शहरवासीयांची आहे. यासाठी एक कोटी साठ लाख रूपयांची तरतूद, जिल्हा नियोजन समितीच्या वतीने करण्यात आली आहे. या बाबतीत नवनवीन प्रस्ताव सादर करण्यात येणार आहे.
या निधी मिळावा, यासाठी कडेगाव शहरातील भारतीय जनता पक्षाचे कार्यकर्ते नगरपंचायतीचे भारतीय जनता पाटीँचे कार्यकर्ते यांच्याबरोबरीने विरोधी पक्षनेते उदयकुमार देशमुख यांनी विशेष प्रयत्न केले. या सर्व कामाच्या नंतर स्व.सुरेश बाबा देशमुख चौक मोहरम भेटीसाठी सर्व सुखसोईंनी तयार होईल. कडेगावातील बहुसंख्य लोकांची अनेक मागणी पुर्ण होणार आहे.
