'सही पोषण देश रोशन'ची कडेगावात सुरवात
कडेगाव/प्रतिनिधी : कडेगाव शहरातील नगरपंचायतीच्या प्रभाग क्रमांक १ मधील माळीनगर येथील अंगणवाडी क्र.२४ मध्ये राष्ट्रीय पोषण अभियान अंतर्गत आहार प्रदर्शन कार्यक्रम घेण्यात आला. या कार्यक्रमामुळे पुरक आहाराचे महत्व पटवुन देण्यासाठी वेगवेगळे उपक्रम सादर करण्यात आले. तसेच तालुक्यात कोठेही न भरलेल्या छोट्या अंगणवाडीतील चिमुकल्या मुलांचा बाजारही या दिवशी भरविण्यात आला होता. अंगणवाडी सेविका सौ.शुभांगी जोतिराम देशमुख यांनी अतिशय नेटके संयोजन केले होते. प्रामुख्याने यामध्ये पौष्टीक पदार्थांचे प्रदर्शन व अंगणवाडी मधील चिमुकल्या बालकांचा भाजी बाजारही भरविण्यात आला होता. गरोदर स्तनदा मातांची प्रतिरूपे साकारण्यात आली होती. यावेळी अंगणवाडी सेविका सौ.शुभांगी देशमुख यांनी मार्गदर्शन करतेवेळी पोषण आहार व त्याचे महत्त्व उखाण्याच्या माध्यमातून सांगितले. यावेळी कार्यक्रमास कडेगाव पंचायत समिती सभापती सौ.मंदाताई करांडे,पंचायत समिती प्रकल्पाधिकारी कलावती शिखरे, कडेगांव नगरपंचायतीच्या बालकल्याण सभापती सौ.अश्वीनी वेल्हाळ,सौ.शांता घाडगे तसेच पालक,माता,भगिनी मोठ्या प्रमाणात उपस्थित होते.